Söngnám er ekki aðeins spurning um að læra lög og söngtækni. Einnig er leikræn tjáning nauðsynleg til að söngur virki og því stendur öllum nemendum í Söngskóla Sigurðar Demetz til boða nám í leiklist og túlkun.
Í barna- og unglingadeild er leiklist fléttað inn í kennsluna. Eftir nám í unglingadeild geta nemendur valið milli söngleikjadeildar og einsöngsdeildar en í einsöngsdeild starfa tvær óperudeildir sem nemendur geta tekið þátt í.
Óperudeildin skiptist í óperudeild 1 og 2 í og er sú fyrrnefnda ætluð grunn- og miðstigsnemendum en óperudeild 2 miðstigsnemendum, framhalds- og háskólastigsnemum.
ÓPERUDEILD I
Aðalleiðbeinandi er Bryndís Guðjónsdóttir en einnig starfar Gunnar Guðbjörnsson við deildina.
Ætlunin er að vinna með nemendum að sýningu þar sem verkefnin verða valin í góðu samráði við nemendur og í samræmi við þann stað sem þeir eru á í námi sínu. Senurnar tengja nemendur með sönglesköflum (recitative) sem hópurinn vinnur saman að því að skapa.
Kennsla fer fram á föstudögum kl. 16-17.30 og er 29900 kr. gjald fyrir þátttökuna.
ÓPERUDEILD II
Aðalleiðbeinendur verða Bjarni Thor Kristinsson og Gunnar Guðbjörnsson en fleiri kennarar munu taka þátt í námskeiðinu.
Í vetur verður samið leikrit þar sem óperuatriði tvinnast inn í söguþráð sem hverfist um óperusöguna. Verkið er samið í samvinnu við nemendur.
Kennslan fer að mestu fram miðvikudaga kl. 17-20 og er gjald fyrir óperudeild II hjá miðstigsnemum kr. 59.900, hjá framhaldsstigsnemum 42.900 en nemendur sem stunda nám á fjórða þrepi sækja óperudeild endurgjaldslaust.